FA’ATAUTŌ LE TŌFĀ IĀ ‘ALE VENA ‘ALE MA MINISITĀ FOU O LE KAPENETA

[Ata Pu’eina]: O le taeao nei, na faia ai le Ulua’i Mafutaga Tatalo a le Fono Aoao Faitulafono a Samoa mo lenei Paeā’iga Lona XVIII ina ua mae’a ai le Palota Aoao iā Aokuso 2025.

O lea Sauniga Fa’apitoa na momoli ai le fa’afetai ma le fa’ane’etaga a Ta’ita’i o Samoa atoa, i le alofa apepele o le Atua Soifua, ua taunu’u manuia ai la tatou folauga i le masina fa’ai’u o lenei tausaga 2025.

O le mae’a o lea Mafutaga Tatalo, ona fa’agasolo loa lea o le Sauniga Fa’aleMālō, mo le fa’atautōina o le Minisitā Fou o le Kapeneta e sui tulaga i se tasi o tamāli’i, le afioga iā Seve Te’i Fuimaono, ua soloia e le Fa’amasinoga lona tofiga Faipule mo lona Itumālō o Safata #1, e aofia ai ma lona tofiga Minisitā o le Kapeneta, ona o matā’upu tau fa’atosina i le Palota ua mavae atu.

I le filifiliga a le afioga i le Palemia, Susuga i le La’aulialemalietoa Leuatea Polāta’ivao Fosi Schmidt ma lana Kapeneta, na fautuaina ai Lana Afioga i le Ao Mamalu o le Mālō iā Tuimaleali’ifano Va’aletoa Suālauvī II, e tusa ai ma le Matā’upu 32(b) o le Fa’avae o le Mālō Tuto’atasi o Samoa 1960 mo le Tofiaina o se Sui Usufono o le Palemene ma Minisitā o le Kapeneta fa’atasi ai ma le Vaega 7(1)(a) o le Tulafono o le Fa’atulagaina o Tofi Fa’aMinisitā ma Matāgaluega 2003, e tofia ai le tōfā iā ‘Ale Vena ‘Ale, e avea ma Minisitā Fou mo le Matāgaluega o Puna’oa Fa’alenatura ma le Si’osi’omaga, ‘Ele’ele ma Suāvai Fa’asaoina, Vaomatua ma le Va’aitau.

Na talia e Lana Afioga i le Ao Mamalu o le Mālō, na fa’atautōina ai loa le tōfā iā ‘Ale Vena ‘Ale.

I le Malelega Fa’amanuia a Lana Afioga i le Ao Mamalu o le Mālō mo le tōfā iā ‘Ale Vena ‘Ale, na ia malele ai e fa’apea;

“Lau tōfā ‘Ale Vena ‘Ale, ia fa’amanuia atu le Atua i lou tofiga, ia faia ma le tonu, sa’o ma le alofa i le atunu’u, ia i ai le Agaga Pa’ia i lau fa’atōfālā’iga, ia manuia lou tula’i mai.”

O lenei tamāli’i o le atunu’u, o le Faipule mo le Itumālō Palota o Faleata #4, ma sa avea nei o ia ma Minisitā Lagolago o le Matāgaluega o le Soifua Mālōlōina.

Na feiloa’i ma feofoofota’i lagona fa’agae’etia o le Ta’ita’i o le Mālō fa’apea afioga i Minisitā ma Sui Mamalu o le Palemene, e momoli fa’amanuiaga i le se’ei mai ai o le tōfā iā ‘Ale Vena ‘Ale i lenei tofiga tāua a le Mālō mo lenei lima tausaga.