TATALAINA ALOAIA O LE FAAMASINOGA O TALOSAGA O FANUA MA SUAFA

Aso Gafua, 8 Tesema 2025

SAUNOAGA AUTU Minisita ole Matagaluega o Fa’amasinoga ma le Fa’afoeina o Tulaga Tau Fa’amasinoga Afioga Fesolai Apulu Tuigamala

Susu lau Susuga ile Taitai o le sauniga, Lau Susuga Rev. Olive Samuelu.

Afio lau Afioga ile Peresetene, Lau Afioga Lesatele Rapi Vaai, tainane Afioga i Fa’amasino ole Fa’amasinoga o Fanua ma Suafa.

Afifio foi Afioga i Faipule ole Palemene o Samoa ua fa’atasi mai i lenei taeao.

Afio lau Afioga, i le sa avea ma Fofoga Fetalai, lau Susuga Papalii Li’o Ta’eu Masipau.

Afio lau Afioga o le sa avea ma Minisita, Lau Afioga Lagaaia Tiaituau Tufuga.

Afio lau Afioga o le sa avea ma Sui ole Palemene, lau Afioga Tofa Li’o Foleni.

Sui o Nuu ma Sui o Tama’ita’i o Nuu.

Le mamalu ole ‘au vala’aulia, ae a Samoa ua potopoto.

E iai le manatu, o o tou paia ma mamalu fa’aifogata, o le’a taoto a o se alao’o, aua o paia ma mamalu e tumau mai le vavau i le fa’avavau, ma o Samoa ua uma ona tofi.

O lea foi ua te’a sa o uila, ma ua maea toto le niu o le tuaoi i lo tatou va feagai ai ma lo tatou Tapa’au Sili, e ala i le galuega sa feagai ai ma lana auauna totofi. Fa’afetai tele i lau Susuga ile fa’afeagaiga mo le manavaga o le Ola, i upu fa’ala’ei’au ma apoapoa’iga fa’aleagaga i lenei taeao.

O le tatalaina aloa’ia o le Fa’amasinoga o Talosaga o Fanua ma Suafa i le aso, ua avea ai lenei aso mau fa’ailoga, ma o se taeao fou, mo le Fa’amasinoga o Fanua ma Suafa.

O lenei Fa’amasinoga o Talosaga, ua fa’avaeina i lalo o le Fa’avae o Samoa, e pei ona teuteuina e le Tulafono o Teuteuga o le Fa’avae 2025, lea sa pasia e le lua-vae-tolu (2/3) o le Palemene ia Fepuari 2025, fa’atasi ai male Tulafono o Teuteuga o le Tulafono o Fanua ma Suafa 2025.

O lenei Fa’amasinoga o Talosaga o Fanua ma Suafa, ua suia le Fa’amasinoga o Talosaga ma Iloiloga (Land and Titles Court of Appeal and Review) lea sa fa’avaeina i lalo o Teuteuga o le Fa’avae 2020. O lea ua fa’amautu ai le tolu o la’asaga i le fa’atulagana o le Fa’amasinoga o Fanua ma Suafa.

O lona taua, o lea ua mafai ai ona maua le isi avanoa fa’aopopopo mo le mamalu o le atunu’u ma so’o se tagata Samoa e sulufa’i ai i le Fa’amasinoga o Fanua ma Suafa aua le finauina ma le puipui o a latou measina – o suafa matai ma fanua fa’aleaganuu.

O lenei Fa’amasinoga, o lo iai le pulega fa’a-fa’amasinoga e tagofia ai ma fofogaina ai ni talosaga apili e agai i fa’aiuga a le Fa’amasinoga Maualuga o Fanua ma Suafa lea e fa’atoai mai i totonu ole 40 aso i le maea ai o se fa’aiuga ole Fa’amasinoga Maualuga.

Ole Taitaifono o lenei Fa’amasinoga ole Afioga ile Peresetene o Fanua ma Suafa, ma o loo aofia ai ma se Fa’amasino ole Fa’amasinoga Sili male Peresetene Lagolago ole Fa’amasinoga o Fanua ma Suafa.

Ia fa’amanuia tele le Atua i lau Afioga ile Peresetene, poo le Taitaifono foi, fa’apea fa’amasino ole Fa’amasinoga o Talosaga, ile galuega taua olea outou feagai ai.

Ia iai pea le tofa male utaga loloto, fa’apea foi male amiotonu aua le fa’afoeina o lenei Fa’amasinoga, ina ia malu mapuipuia a tatou suafa matai ma fanua fa’aleaganuu – o measina a aiga, o le fa’asinomaga male mitamitaga ole tagata Samoa, mo nei ma a taeao.

Fa’afetai tele i lo outou paia ma lo outou mamalu, ile Afifio male tala mai o aao, i lenei taeao aua le molimauina o le fa’amoemoe o lenei aso, ole tatalaina aloaia ole Fa’amasinoga o Talosaga o Fanua ma Suafa.

O lea ou te fa’asilasila atu ai ua tatalaina aloa’ia lenei fa’amasinoga.

Soifua ma ia Manuia.

December 12, 2025