ULUAI SAUNOAGA FAA-PALEMIA A LE AFIOGA IA Hon. LAAULIALEMALIETOA POLATAIVAO LEUATEA FOSI SCHMIDT [Aso Lua 16 Setema 2025]

SAMOA, September 15 - Lou agaga e ia e faamanu atu ia Ieova, o mea uma foi o i totonu ia te au ia faamanu atu i lona suafa paia.

Lou agaga e ia e faamanu atu ia Ieova, ma ia aua foi nei galo se mea e tasi o ana meaalofa.

O lea ua maea ona sausau le fuesina, ma ua faaaloalo fue afu

Ua felelei foi manusina ma ua sa manuvale, aisea? o lea ua aumai le malelega mai le lagi na saunoa iai le taitai o le sauniga..

Gogosina foi e le soaina, talagapasina e le faatusaina le malelega lea ua momoli mai ai le saunoaga a le Afioga i le Ao mamalu o le Malo.

Manatu lea o le malelega momoli lea ia Samoa ua potopoto

Ua atoa ai utu o le upega aua o lea ua atoa Samoa i sa ma Faiga ma paia e tumau e oo i le faavavau.

Matou le faaluaina le malelega i le tala, ae tau ia o se matou leo faafetai faapipii e agatonu ai lo tatou taeao ma le aso.

O le a tafai ma ia le tamaloa na liufatu i le Alataua, aua ou paia popo ma ou sa le solo Samoa, o ou fuesina loloa ma oe afa loloa, o lou tino i le toa ua ola ai Samoa.

Paia maualuga aua ou mamalu faale-talalelei, o ou mamalu faale-atunuu tainane ou mamalu faale-malo.

Fai ai lou leo e fai ma fofoga tau momoli, o e na faauuina uma i le aso, ma Palemene filifilia, o sui usufono taitoatasi, momoli atu ai lo matou agaga faafetai tele i lau Afioga i le Ao mamalu o le Malo ma lau Masiofo, momoli le agaga faafetai i lo outou sa seetolu aua sui o le Fono a Sui Tofia, lau Susuga i le Malietoa, lau Afioga i le Tuiatua Tupua Tamasese, ma lau Afioga i le papa Laulu Mapesone.

Momoli le agaga faafetai i le aso aua o lea ua sooula le fala o le paia lava lea ia Samoa i ona tulaga faalupe, ua potopoto, mai le matafau e oso ai le la, e oo i le mea e gase ai lana taamilosaga, o le paia aua Tumua ma Pule Ituau ma Alataua, Aiga i le Tai ma le Vaa o Fonoti.

Malu tauee foi le afio o lau Afioga i le Faamasino Sili, tainane lau Afioga i le Peresetene, alii ma tamaitai o le Faamasinoga sili a Samoa, faafetai le afio mai ma tala mai aao i le aso.

O le vaa nofoa tolu lea aua le tausiga o le nofo fealofani, le faatemokalsi moni, tausia i le filemu ma le manuia o Samoa, fetausiai, va fealoaloai, ae le fevaaiai.

O le taeao ma le aso, o lea ua soo ula aua le afio mai o a tatou uso mai le motu i Sasae, ua atoa ai Samoa aua la tatou fesilafaiga i le aso i le afio mai o lau Afioga i le Kovana Sili lau Afioga Ulalii Nikolao Pula ma le faletua.

Afio lau Afioga i le Peresetene o le Senate lau Afioga Tuaolo Manaia Fruean ma le faletua, lau Afioga i le Fofoga Fetalai, lau Afioga Savali Talavou Ale ma le faletua, tainane la outou aumalaga.

O le paia lava lea aua sua ma le vaifanua, fofo ma itulagi, Saole ma Saleaumua ma le launiu na saelua, tama a le Manua tele faleagafulu o le motu tootoo o le Faleula ma le laau na amotasi.

Samoa lena ua uma ona faataatia e o tatou matua ona faavae papa, tasi le tama, tasi le tina, aiga tatou.

Momoli atu le agaga faafetai tele lo tou afifio mai ma tala mai aao e faamalumalu Ie taumafaiga poo le faauuina o le Palemene XVIII a Samoa i Sisifo.

Momoli le agaga faafetai tele i lau tapuaiga Samoa i lenei itula o le aso i itumalo uma e 51 o le tatou atunuu, mai le mata Aleipata seia paia fili ma puletuu na tauilo ai malo, Aisea?

O lea ua faaifo le naaloa i le tuamafa filimalae, ua tulima tu tula ua faaifo le segaula, ua a’e le faiva o alii aua ua tautau upega lauga, ua magalo ai le ava nai Salemuliaga e tofutofuola le vai o le fale Tuamasaga.

Ua taulau o le faamoemoe o lau filifiliga Samoa o lau tofa ma lau faautautaga, o lau moe faaalu, o lau mau taofimau Samoa o lea ua alai le aso.

Itumalo uma e 51 o le tatou atunuu sa feagai ma le faiga filifiliga a Samoa o lau tou pule lea aua lenei nofoaiga.

E le mafai ona faagalo Afia i si ona vao aua faapei ona naunau o le aila i vaitafe, e lele le toloa ae maau i le vai le paia o Samoa i tafa e fia o le lalolagi poo fea lava sa outou faafale le malu ai ma outou ai tau malele i lo outou tautua apaapa ma tautua taumamao e le o mafai ona toe natia ifo lo outou fatu mo le faiga filifiliga lenei

Momoli ai le agaga faafetai tele i soo se Samoa na malaga mai atunuu mamao e tautua le atunuu soo se Samoa o loo outou alala i atunuu mamao ma faaauau mai lo tou tautua matapalapala mo Samoa.

O le tatalo alofagia ia outou malolosi pea e lafo mai tupe e atinae ai le atunuu.

Faaleoina le agaga faafetai e le faagalo afia i si ona vao le tautua a tatou matua, futia ua sola ma aso ua alu aua ana leai faiva na lea na laulau sasaa e leai se taeao faapenei.

Tatou te manatua ai ma le loto maualalo e na asaina le gasu o le taeao o e na finauina lou malo Tutoatasi Samoa.

Tatou te manatua ma le loto maualalo la latou faiga taulaga ma lo latou saili malo ua tatou aulia ai le 63 tausaga o le tatou Tutoatasi e le mafai na galo, sa latou tulivae i le Atua ma tatalo i le Atua ia sao le faasinoala ma le faasinomaga ua a nei ua o tatou vaaia ia ataata o tauleleia peitai o le taeao sili o le taeao na malele ai le tausala o papa ia Malietoa, Malietoa ua uma ao ma iu o malo ae sau e faatalitali i lagi se ao o lou malo.

Samoa o le taeao ula lena, ia aua aua nei galo i ola le taeao nai Mataniu Feagai ma le ata, le taeao nai Faleu ma Utuagiagi, le taeao nai Malaeola ma Gafoaga ma le mau taeao e fia o loo punapuna fanau pea i le taimi nei aua le galuega a le Atua.

Momoli atu ai le agaga faafetai tele i taitai uma o Ekalesia Kerisiano i Samoa ma Susuga i faafeagaiga taulagi uma ua o tatou faatasi i lenei aso.

Matou te talitonu i lo outou tootutuli i le Atua ia aua nei aveesea le faavae o Samoa Ia faavae i le Atua Samoa.

Afa isa iai ni futia ua sola ma aso ua alu na sopo ai le tai i le eleele ma sopo ai le puleao i le pulepo e iai le taimi o le Atua e toe foi ai le vai I le mea na tafe mai ai o lea ia tatou manatua O le Atua e pule i mea uma o lo tatou ola.

Momoli le agaga faafetai i taitai uma o Samoa o e na uluai Ao o le Malo le Afioga ia Malietoa Tanumafili II, le Afioga ia Tupua Tamasese ua fai i le lagi lo la soifua ao le taulaga na osi Samoa e e le mafai e upu ma tala ona taia ae faafetai i le Atua i le la tautua matapalapala ma le alofa moni i le atunuu.

E le mafai ona faagalo Afia i le faaaloalo maualuga sa feagai ai e sa taitaia le malo lau Afioga Mataafa Faumuina Mulinuu II o le uluai Palemia o Samoa, lau Afioga Tupua Tamasese Lealofi IV Palemia lona 2 o Samoa, lau Afioga Tuiatua Tupua Tamasese Efi le palemia lona 3 o Samoa, lau Afioga i le aloalii Vaai Kolone le palemia lona 4 o lo tatou Malo, le Afioga i le Tootooalii le Afioga Tofilau Eti Alesana le Palemia lona 5 o lo tatou Malo, lau Susuga Tuilaepa Sailele Malielegaoi le palemia lona 6 o lo tatou Malo, ma lau Afioga le Sao na Faapito Fiame Naomi Mataafa o le palemia o lea fatoa tatou taumavae nei.

E ese a le taimi o le tagata ese le taimi o le Atua. Samoa e le toe tau faamatala atu o lea ua aumai le feau faaleagaga.

O le numera 8 i lou tulai o le amataga fou i lo tatou atunuu. Ou te tatalo atu i le ava ma le faaaloalo tele e tatau ai.

O le nofoa lea o le nofoa o Samoa e le o so’u nofoa o le nofoa o le atunuu e leoleo faatasi e puipui faatasi ma tausi faatasi e Samoa uma.

O a ni a tatou feeseeseaiga i upu ma tala o le lumanai ou te tatalo atu ma lou agaga faaaloalo o ananafi ua u iai le tua e le toe fia manatua ae ina omaia le atunuu pele tatou fusi faatasi le fau o malo ma o tatou saili malo mo le lumanai.

Lau Susuga Tuilaepa Sailele Malielegaoi lau afioga le Sao Faapito Fiame Naomi Mataafa e le laititi le taimi na tatou mafuta ai ma e silafia e le Atua le taimi o tatou galulue faatasi.

Faafetai mo galuega uma sa faatino mo le atunuu i lenei fia tausaga.

Faafetai i o lua faiva alofilima e le tau iso e le tau tautalagia pe tau faailoa ua iloa e Samoa ae sili ai ona taua lae silasila fofoga o le Atua.

O lau tatalo faafilemu le atunuu afai tatou te maua le fealofani ua filemu le tapuaiga a Samoa.

Ua apo faatasi le galulue faatasi a Samoa mo le lumanai Aisea? Tatou faia se faavae fou tatou agai ma savavali e uulima faatasi o lau ma la’u tuufaatasi ia manuia Samoa.

O le faatomuaga o le nofoaiga lenei e le mafai e le malo ona toe fau nao ia le atunuu e tutu faatasi le Ekalesia tutu faatasi le atunuu Samoa nei ma atunuu mamao ma le malo ona le pine loa lea ona manuia Samoa.

O le malo o tagata i tagata mo tagata e le o se malo nao le malo o le malo e fau faatasi e iai le tiute o le aufaigaluega totofi a le Atua e iai le tiute a le atunuu tama ma aiga lea foi tatou te faatasi ma le va faa feagai ai aua Tutuila ma Manua tuufaatasi loa ma le auaunaga o tatou ua filifila i le aso ona le pine lea ona tau i manu le faamoemoe

Ao lua mama na alofagia e le Atua o oulua faiva alofilima e faaauaua ai la oulua auaunaga faafaufale o le a tatou fesootai pea e fesili atu lava i ni tulaga o fautuaga.

E le faagaloina le afioga i le Fofoga Fetalai na seei i le nofoaiga ua maea atu lau susuga Papaliitele Lio Taeu Masepau tainane Sui Faipule uma sa tatou mafuta i le nofoaiga na mavae atu.

O le maea o lesi galuega o le amataga foi lena o leisi galuega fou mo le lumanai, sagai ae laia o ai o le tai a outou faiva alofilima lau Susuga Papaliitele silafia e le Atua lau galuega sa faatino aua la tatou Palemene.

Le tatou Palemene XVIII uso e o tatou o auauna a le atunuu o tatou o mulumulu vae a le atunuu o tatou o tavini a Samoa.

Ia outou alofagia la tatou paeaiga lenei ua tapena le aiga o le Faatuatua i le Atu Samoa ua Tasi tuu atu o matou lima tuu mai o outou aao tatou galulue faatasi.

Afai o le finagalo lea e manuia ai le atunuu o le matou faatalauula atu lea o le a tatou faasolo i tulaga uma e pei ona iai polokalame faataatitia aua le manuia o si o tatou atunuu.

Lou Itumalo pele le Gagaifomauga Numera 3 paia lava lea aua Aiga sa Tupua ma Aiga sa Malietoa ma le mamalu i le Faletolu Paia ia te oe Sa Tupua Sa Lealiifano ma Sa le Tolo tainane le paia o aiga o le mavaega lau Tofa le tuua o le Pao le Falelima o saga eseese aemaise lo tatou Itumalo.

A outou susuga i Faafeagaiga Taulagi lau Susuga i le taitai o le Sauniga i lenei taeao tainane Tama Sa uma o lo tatou Itumalo Viia le Atua O ai i tatou ua manatu mai ai Viia le Atua i tofiga ua tatou taunuu iai.

Aisea? E le galo le tautua a o tatou matua mai le amataga. O le itu faamalo faavae o le Gagaifomauga 3 o tatou tama na asaina le gasu o le taeao e a le taeao lenei faafetai i le Atua ua tusi aao Samoa mo le tatou itumalo.

Ae momoli le agaga o le faafetai tele ona o la outou faaaloalo na outou tofi ai au e avea ma sui o le tatou Itumalo 20 tausaga talu ai le Laaulialemalietoa na outou faaee ia te au faamanuia iai le Malietoa Tanumafili II faamanuia foi iai le Malietoa Moli lea e alala mai aua tou te toe apoa le pola e motu i tua agai i luma lo tatou vaa. Ua mavae atuvasa o tiga ma faigata sauni laia tatou te sapi i tulaga o le faamalumalu a le atunuu aisea? aua e leai se tautua e alualu fua e leai foi se tautua e alualu noa ao lau tou pule lea lo tatou itumalo faafetai ua fetefaina le tofa ma le faautautaga ia Samoa e avea ai tatou ma taitai o le atunuu.

Momoli lou agaga faafetai i aufaigaluega uma lava a lo tatou Malo faauluuluga o Matagaluega ma Faalapotopotoga uma lava a lo tatou malo. O outou o tama fanau o suli moni o suli faavae uma o Samoa na tofi tofa outou tout e tauaveina tiute faatagata faigaluega a le malo faamalo le galulue faamalo le onosai faamalo le tautua e pei lava o le tatou feiloaiga i le uluai aso e le o se faigamalo a le Faatuatua i le Atua Samoa ua Tasi o le faigamalo a Samoa atoa tautuana lo outou valaauina e sao i maau ma tatou sao i Fagalele pe afai tatou te tutu faatasi ma faauau foi galuega tautua i mea o lo ua finagalo ai lo matou tofiga i lenei vaitau ua nao i matou o ni tagata faigaluega ma ni tagata tausimea i totonu o le 5 tausaga.

A maea foi ona toe filifili foi lea o Samoa poo le a le isi tali e aumai mo le lumanai o outou mama foi na. Matagaluega uma a le malo alo ane laia faiva o le tai aua le tatou galuega e le laititi, o le galuega tele e tatau na faaauau o loo tapuai le atunuu.

Momoli le agaga faafetai i malo uma mai fafo Diplomatic Corps o loo alolofa mai i lo tatou atunuu.

Tatalo ia faamanuia le Atua ia outou uma ma papa aveloa pea sootaga faaupufai o malo e manuia ai Samoa nei ma a taeao.

Ou te faafetai i ou aiga si ou tama ma si ou tina le Afioga ia Honourable Polataivao Fosi Schmidt lou tina ia Puletiuatoa Fuimaono Ipuniuatea Anae, tainane ou matua ia Tuliaupupu Fata Lima ma Talaetau Lima ona o le faafaileleina o lou tagata fataauvaa o lea ua mafua ai ona ou tulai i le aso e ala i tofiga a le atunuu e le mafai foi ona galo nisi o aiga na asaina le gasu o le taeao i tala faasolopito i totonu o upufai o malo le Afioga ia Tuu Lolesio le Afioga ia Peseta Seko Simiti le Afioga ia Tiapili Filisi le Afioga ia Lavea Tuu Unasa Lio ia ma nisi o le aiga na mafua ai ona tai le ala ma tala le gafa o le aiga I totonu o le polokiki ma upufai o malo

Lagona le agaga faafetai i le Atua ona o la outou galuega sa fauao faupo.

Faaiu mai se tala si ou toalua faapelepele, Mom ua e lailoa ma si ta fanau talu le ta tofiga ma le malo, faamalo le onosai faamalo le tatalo faamalo le faamalosi faamalo le tautua faamaoni aua le tauaveina o ta tiute.

E le o toe lilo i lalo le lalolagi ma ona upu faafetai i lou faatuatua moni i le Atua o loo toa ai i aupeau le ta savaliga.

Si au fanau pele my children viia le Atua tatalo i le Atua e faaauau mea um ana faasino ia te outou aua o le alafua lava lea tatou te savavali ai e faaauau le tautuaina o le tatou atunuu.

Ia nao au grandchildren e toa tolu 7 masina ou te lei vaai iai talu na omai i le lalolagi lenei ona o le pisi i le taumafaiga o le mau faamasinoga o fai nei ia ma le faigapalota o lea faatoa uma atu o lea fatoa oo mai I fanua e feiloai mai I le tama o le aiga a ua fitu masina e lei vaai i se tama o le aiga. Ui o lea viia le Atua ua tatou feiloai.

Faamuli ma le ai se tala le tatou aiga o le Faatuatua i le Atua Samoa ua Tasi. Ia outou manatua le faavaepapa o lo tatou aiga fai ma manulauti o le savaliga le 51 o itumalo le a le feau a le Atua na aumai e ala i le aufaigaluega tatou omai e saili le amiotonu ia naunau i le alofa ma tatou savavali i luma o le Atua ma le loto maualalo.

Tautuana ma outou tatou o Minisita, Minisita Lagolago o Minisita ma Minisita Lagolago a le atunuu tatala le faitotoa 24 itula o le aso e fai ai le auaunaga aua le atunuu gasolo atu Tautuana le atunuu

Lea ua outou silasila e le faigofie aisea? E le nao tatou na finau o lea ua tatou oo i ooga i le loloto o felafolafoaiga ma saunoaga na fai i le atunuu ao le a le tali a Samoa lea ua aumai e faatiatuaina lo tou paia ,a lo outou mamalu.

Sagai ae laia o ai a le tai.

Faamanuia faamanuia lo tatou aiga.

Le paia o Samoa malaga mamao mai fafo o la matou faafetai faaiu lena Alofagia e le Atua se taimi tatou mau eseese ia folau i lagima la tatou mafutaga.

SOIFUA.

September 22, 2025