TATALAINA ALOAIA O LE A’OA’OGA MO AUAUNAGA O LE AUFAIGALUEGA FESOASOANI FAA-AGAFESOOTAI [Aso Faraile 04 Oketopa 2025]

SAMOA, October 3 - SAUNOAGA AUTU a le Afioga Ile Minisita o Tina Ma Tamaitai, Atinae o Nu’u Ma Agafesootai le Afioga Moefaauouo Julius Ah Kui Tafunai

Susu lau susuga i le Taitai o le Sauniga,

Afioga i Minisita o le Kapeneta,

Fa’aulu’uluga o Pa’aga a le Malo,

Fa’aulu’uluga o Fa’alapotopotoga ma Matagaluega,

Le mamalu o le Au Vala’aulia,

Samoa ua Potopoto

O le a ou le seutafilia le naaloa, ae o le a seumalie lupe o le fōaga, faigatā o lea ua malumaunu le fogatia, ua matalupe le seuga ma tau fai puea le matila ma le ofeloa ia outou paia ma le mamalu ua aofia pōtopoto lenei taeao. O ō outou paia ma sā o le a le o’o ai se fa’amatalaga, aua o outou paia e lē popo.

O le Asō, o se aso tumati’e ma se moemoe fou mo Samoa. Ua le gata i le tatala aloaia o le A’oa’oga mo Auaunaga o le Aufaigaluega Fesoasoani Fa’a-Agafeso’otai, ae e fa’amautu ai foi la tatou tautoga faifa’atasi: o le puipuiga lea o fanau, si’itia tomai ma agava’a o tupulaga talavou, fa’amalosia o aiga ma malu puipuia afioaga.

Ua mafai ona fa’atino vaega uma nei, ona o le malosi o le faigapa’aga a le Matagaluega o Tina ma Tamaitai, Atina’e o Afioaga ma Agafeso’otai ma le Fa’alapotopotoga o le UNICEF. O se galuega faifa’atasi, ua mafai ai mo le taimi muamua, ona fausia se taiala mo A’oa’oga mo le Aufaigaluega Fesoasoani Fa’a-Agafeso’otai i totonu o le Pasefika — aemaise i latou o lo’o ta’imua i le puipuiga o Nu’u ma o lo’o vavalalata feso’otaiga ma aiga ma fanau.

O lenei fa’amaite, ua atagia ai le taulamua o Samoa i le Pasefika ma le Lalolagi. O lo’o taoto faiga fa’avae ma le Fa’atonufolau mo le Tapu’eina o Olaga Amata o Fanau i Samoa, ma o lo’o o gatasi ma le Silasila Mamao a le Malo – ina ia gafataulimaina aiga, saogalemu le siosiomaga, ma si’itia le soifua lautele o tagata uma. E iai se vaega e ese’ese ai lenei galuega, aua o le a le gata i le faia o A’oa’oga, ae ua maea fausiaina foi se galuega tele (Performance Management System: PMS) e mafai ai ona mataituina, aoina mai ma iloiloina fa’amatalaga ina ia si’itia ai galuega fa’aauau.

O le taunuuga o le PMS ua tula’i mai ai le Impact Pulse – o se ripoti i se tulaga maualuga, e atagia mai ai fa’amatalaga o lo’o tu’uina ai e afioaga, o a tonu ni fa’aletonu o feagai ma tagata, ma o le a foi ni vaega o lo’o manaomia ai le fesoasoani. E le o se galuega na ona fafau – o fa’amatalaga ma lagona o tagata ua aoina mai i le taimi ma aso fa’amauina e taua tele. O le vaiaso fou, o le a tatala aloaia ma fa’alauiloa ai the Uluai Ripoti a le Impact Pulse i Samoa, ma o se Ulua’i Ripoti foi lea i totonu o le Pasefika.

Afai ae tu’ufa’atasi tomai ma agava’a aemaise fa’amaumauga mausali e maua mai i le Ripoti o le Impact Pulse, o le a le fesiliga le si’itia ma le malosiaga o auaunaga a Sui o le Nu’u, Sui o le Malo ma Sui Tamaitai. E le gata i latou auaunaga i le puipuiga ma ta’imua i galuega mo le saogalemu ma le manuia o Nu’u, ae o latou foi o le a ta’imua e aoaoina ma tu’uina mai o fa’amaumauga – o le silafia e mafai ai ona iloa gofie fa’afitauli, feso’otai aiga i auaunaga mo’omia ma fa’atino ma le mautinoa ina ia tutusa tagata uma, aemaise i fanau, tupulaga talavou ma aiga uma. Ina ia aua nei galo se isi.

Ua le gata la i le tatou patipatia o lenei Aso ma le fa’amoemoe. A ia tatou unaia galuega fa’aauau e fesoasoani ai i Aufaigaluega mo Auaunaga o Fesoasoani Fa’a-Agafeso’otai. E mana lenei galuega, ma o le a mamafa tu le avega – o le ala lea e manaomia tele ai le lagolagosua a Afioaga, le Malo ma ana Pa’aga.

O lo’o fuafuaina, o le fa’aiuga o le tausaga fou e tauala atu i lenei galuega faipa’aga, o le a 102 Aufaigaluega mo Auaunaga o Fesoasoani Fa’a-Agafeso’otai—e toalua mai i Itumalo e 51 o Samoa, o le a a’otauina ma tu’uina iai le fesoasoani mana’omia. O le a galulue so’oso’otauau ma feso’otai e tusa ma tu ma aganu’u, soifua fa’aleagaga ma aiga, fa’apea foi le silasila i le lumanai i le fa’aaogaina tatau o fa’amatalaga aoina, molimau ma lagona o tagata ina ia faufau ai se lumanai manuia.

O se sao taua lea o Samoa i le Pasefika ma le Lalolagi, o se galuega e atagia le fa’atauaina o le fatu o nu’u e fa’avae i luga o tu ma aganu’u, maua fa’amatalaga fa’amauina, ma e iai lona taua i le va fa’afeagai ai ma isi Malo.

Ma o lenei Aso, i le agaga fa’agae’etia, e fai ai a’u ma sui o le Malo, e tatala aloaia ai nei le A’oa’oga mo Auaunaga o le Aufaigaluega Fesoasoani Fa’a-Agafeso’otai.

Mo le mamalu o le aofia ua potopoto i le Maota nei, o outou e fa’afailele Fanau, o Uo mamae a Tupulaga Talavou, o Malu o Aiga, o Fofoga o tatou Afioaga. O lou atamai ma lou silafia, fa’atasi ai ma le fesoasoani a le PMS e ala mai i le Impact Pulse, o le a fesoasoani tele lea i sou sao e tatou fausia fa’atasi ai se Samoa saogalemu ma se Samoa manuia. Mo le silafia — o le a tutu fa’atasi le Malo o Samoa, ma le UNICEF e lagoalogosua i lau auaunaga. O le tatou galuega e fai faatasi.

Ia tatou taofi mau i le mea moni: e taua tamaiti uma, e iai agava’a ma taleni a so’o se tupulaga, e mamala aiga, o afioaga uma o le fatu lea o Samoa le Atunu’u Pele.

Fa’afetai tele lava.

Soifua ma ia manuia.

Photo by the Government of Samoa

October 9, 2025