ULUAISELESELEGA VAISIGANO 1 [Aso Tofi 12 Iuni 2025]

SAMOA, June 12 - SAUNOAGA AUTU a le afioga i le Minisita o Fa’atoaga ma Faigafaiva, Hon Niuava Fata Eti Leatiogie Malolo Funefeai

O lea ua I liu o vaa atu sisi a tautai ma ua maea ona faalele manulagi ma lulu le salefu paia e ala I faiva laulau sasa’a o lau Susuga I le taitai o le sauniga, lau Susuga Rev Pulea Tiumalu. Faamalo le folafola. Faafetai tima’i.

Oute mua’i taia le seuga ma faapoi le vaiula i paia ma sa o lenei aso. Le susu o lau Susuga i le taitai o le sauniga, Afifio Minisita o le Kapeneta, Afio le Pule Sili o le Matagauega o faatoaga ma le pulega tainane Samoa ua potopoto I Mati’a Mati’aituau nei. O outou paia o le a ou le aoaoina faafausa malepe aua o paia ua uma ona tu’ulaupua ma tosi lauti e le gafatia e se faamatalaga. Tau ina ou faatulou nei sipa se lamaga ona faitauina lea o so’u vaivai. Tulou tulou lava.

Ua malama i ulugalu le ute ma le anoliu o lenei aso ma lona faamoemoe e pei ona molimauina e le atunuu. O se taumafaiga ma se fuafuaga alualu mamao a le malo e tauala mai i le Matagaluega o Faatoaga ma Faigafaiva ina mautinoa le tafiesea o le oge i Samoa e ala i uunai o faatoaga ae le gata i lea o le atinaeina o lo tatou tamaoaiga.

E le tau faamatalaina le tulaga ua iai le soifuaga ma aafiaga ua aliae mai i fale gaosi oloa i fafo oloo tele ina faamoemoe iai le fofoga taumafa o lo tatou atunuu. E le gata ua siitai lona tau ua lagona ai le iu leo ua taugata le soifuaga, ae ua tele ai foi ma faamai eseese ua aafia ai lo tatou atunuu.

E maualuga le talitonuga a le tatou malo e tauala mai i le tatou Matagaluega oloo tele le gafatia e o tatou tagata ona galueaina o tatou eleele ina ia vaoia ai lo tatou toe faalagolago I fafo mo tatou taumafa i aso fai soo. E ala le i le toto ma faafailele laau faisua ma lau taumafa mata mo le soifua maloloina, amata ni fagaga puaa, povi, mamoe ma moa mo tatou aano o manufasi aemaise o figota ma ‘ia o le gataifale e le maua ai tatou i se mai.

O lo tatou Itumalo o se tasi lea o itumalo e pito i tele lona laufanua i a Samoa ma e manaomia ona faaaoga tatau i faatoaga ma lafumanu aua le tamaoaiga o aiga taitasi. Oloo maitauina le lelei o le tatou atinae koko ma le ava aemaise le moli saina lea oloo fuata nei ae manaomia ona sauoo le atinae i isi faatoaga eseese ina ia le vale tuulima manuia o le Itumalo mo a taeao.

Oute fia faamanatu atu i le mamalu o le au faatoaga a le tatou Itumalo ina ia faaaoaga tatau avanoa o polokalama faagasolo a le tatou Ofisa o faatoaga aemaise poloketi oloo faagasolo mai ina ia fesosoani i a tatou atinae tau faatoaga. Ua saunia le tatou Matagaluega e tuu mai le lagolago ma le fesoasoani e ala i aoaoga ma faalauiloa mo le faamautinoaina oloo faasoa le tomai mo fai faatoaga a Samoa.

O lenei aso o le a selesele ai le fai faataoaga sa galue malosi, le fai lafu manu sa faamaoni ma toaga aemaise o isi atinae eseese ua molimauina I le aso. O le naunautaiga lava o le tatou malo ia lava taumafa a le atunuu ma ia uunai le galueaina o tatou eleele ina ia maua pea se Samoa e fiafa, filemu ma saogalemu.

Agalelei mai le Alii i le faamoemoe I lenei aso ina ia tau I manu viia pea lona suafa mamani e toatasi. Maua le mau I le susuga I le taitai o le sauniga, maua le tofa paia I aiga ma Tapaau tu ma ati le faautaga a tula o le Itumalo aua fale ma fafo. Manuia le aiga kapeneta ua faatasi mai, soifua manuia le Afioga I le Pule Sili ma le Pulega aemaise Samoa ua potopoto.

I le ava ma le faaaloalo oute faasilasila atu ai ua tatala aloaia nei le Uluai Seleselega a Vaisigano 1.

Soifua.