SUAINA O LE ELEELE MO LE AMATALIA O LE GALUEGA O LE FAUSIA O LE FALEMELI I SALELOLOGA [Aso Tofi 12 Iuni 2025]

SAMOA, June 12 - SAUNOAGA AUTU a le afioga ia Mau’u Siaosi Puepuemai

Manatu o lea ua mapu le tuamafa filimalae i lona uso kagua o lea ua maea oga kaia le papaloa ma faasega le papa i olomea.

Aua faiva alofiaao sa fitaituga iai lau Susuga i le taitai o le sauniga o lea foi ua maea ona pae lelei ua pae foi i uga le maualuga o le tatou taeao ma le tatou mafutaga manatu lea e le toe aufaga i so matou leo.

Lea ua maea ona tofilauniu e le fofoga o le tatou aso sa fai ai lau Susuga i le taitai o le Sauniga lau susuga Asosili Seuseu

Afio foi lau Susuga i le Minisita o Faamasinoga lau Afioga Matamua Vasati ma o le sui faipule foi o Tapaau ma Salelologa ma le tatou Itumalo.

Afio tou afioga i Ofisa Sili matagaluega a le tatou Malo.

Afifio sui o le afioaga o Tapaau ma Salelologa tainane foi le afio mai lau afioga i le taitaifono ma le mamalu o le Komiti Faafoe ma le pulega o le falemeli.

O paia ia ma mamalu sausauloloa o le tatou atunuu o lea ua tatou ofaga potopoto sei o tatou molimauina lenei faamoemoe e fitoitonu lava i le falemeli o Samoa.

O le auga o aute o lenei taeao o le faapaiaina o le eleele ma lenei fanua aua le galuega fuafua mo le ofisa fou o le falemeli i lona uluai taimi lea o le a fausia i eleele o Tapaau ma Salelologa i Salafai nei

O lea sa ou faalogologo i le feau taumolimoli e pei ona saunoa iai le taitai o le sauniga. Malo faafetai i le faamalosiau.

Faafetai foi i le faamanatu o le faamoemoe lenei o le ofisa o le falemeli i Salelologa nei o le uluai taimi lea ua fausia ai ma faatuina ai se ofisa aloaia i lona tulaga aoao tetele e pei lava foi ona malie i nisi o mafaufauga “O le mea e sili ona lelei i Upolu e silisili foi ona lelei i Salafai nei”.

O lenei galuega o loo solosolo lelei ma fuafuaga alualu mamao a lo tatou malo.

E ui lava o lea ua malo tausi lo tatou malo ae le mafai ona taofia pe noatia ai galuega ua uma ona faataoto e le afioga i le tamaitai Palemia le afioga i le Sao Faapito, le afioga ia Fiame Naomi Mataafa e faapea foi le mamalu maualuga o le Kepeneta.

E le o toe po i lo outou silafia le tulaga ua iai.

Momoli foi le faafetai tele i le tamaitai Minisita o Faamasinoga o le tofi foi o lo outou itumalo.

Ina ua ou tulai mai e avea ma minisita o falemeli ma fesootaiga sa iai lava lou popolega ina nei le tau ma le au le faamoemoe e pei ona iai le taeao nei.

Ma e momoli atu ai le faafetai e ui foi ina sa tele se taimi sa talanoa ma fetu’unai ia o lea ua tau le faamoemoe.

Faafetai foi i lau Afioga i le Sui Faipule lau Afioga Matamua ona o le galulue aemaise lava o le taumafai o atinae e le mo se toalua e le mo se afioaga ae mo le motu tele i salafai ma Samoa aoao.

E avea ai foi lenei avanoa matagofie oute faamalo atu ai i le Kamupani a le Fairview Co Ltd, lea sa faamanuia ina i lenei galuega mai i Kamupani uma sa tauofo mai i lea faamoemoe.

E ia te au nei le ava tele oute fa’ailo atu ai o lea ua fa’amanuia le Atua i le ele’ele ma le fanua nei mo lea atinae taua a le tatou Malo.

Ma ua iai foi le fuafuaga o le a tatala aloaia lenei atinae po’o le ofisa fou a le Falemeli, i le Aso Tofi 26 Iuni 2025.

Fesoasoani mai le Atua i lenei fa’amoemoe a le tatou Falemeli a Samoa.

Soifua ma Ia Manuia

ATA PUEINA – Malo o Samoa [Litia Taateo Aviata]

July 8, 2025