SAUNIGA FA’APITOA MO LE TAU’Ā’AOINA O FA’AILOGA TAUĀLOA FA’ALETAUSAGA MO SO’O’UPU [ANNUAL SALES AGENT AWARD] A LE FA’ALAPOTOPOTOGA O INISIUA TAU SOIFUA I SAMOA. (Aso Tofi 31 Iulai 2025)

SAMOA, July 30 - SAUNOAGA FA’APITOA a le Afioga i le Minisita o Tupe Hon. Lautimuia Afoa Uelese Vaai

Ae ou te le’i la’asia le Uluulutao, e pei o le tala i ilāmutu o le laoso, o tamaitai o Po ma Ao ma lo la fale e tulutulu i tao ma puipui i tao. E muamua ona ou leu le i’u launiu nai le Fale Tuamasaga, na liliu ai le manao sa tilialo o le Malietoa. Aua e faigata ua tagata atoa le vao, e pei o le tala i le Taua o le Aea i Sasae. O pa’ai faaleaganu’u, o pa’ia faalemalo, faapea pa’ia faaletalalelei, aua tulatoa ma le aufueloloa. E leai se vave e fia leo lagona iai. Aua o pa’ia mai le vavau e oo i le faavavau. Nuunuu atu ia i le fa’autuga o Alii.

Ao lenei aso ma le faamoemoe, tatou tau fai patipati le alofa o le Atua ua mafai ona tatou mafuta faatasi i lenei afiafi e molimauina le faamoemoe o le tatou vaega o sui sooupu a le tatou Faalapotopotoga. E faafetai atu ai i lau afioga le Taitaifono ma le Komiti Faatonu, le Pulesili ma le Pulega mo le valaau faaaloalo. Ou te manatu o lenei afiafi ma le faamoemoe tatou faafoi faatasi le viiga i le Atua i lana pule faasoa i lo outou soifua auauna, le malosi, o agavaa ma tomai aemaise o le ola finafinau ina ia siitia matatia i lea tausaga ma lea tausaga faaletupe.

Pe a maitau atu ma le toto’a i fuainumera faamauina faatusatusa i le lima tausaga ua tuanai nei i pisinisi sa mafai ona ausia e sui sooupu i a outou galuega tuuina mai i totonu or submissions. E lagona lava le agaga faagaeetia ona o le siisii maualuga o tatou pisinisi fou i lea tausaga ma lea tausaga aemaise le maoa’e o pisinisi o le tausaga faaletupe 2024/2025.

2021 2022 2023 2024 2025

$2,212,976 $2,250,227 $2,401,463 $2,914,100 $3,769,335

O lea momoli le agaga faafetai i le tatou vaega o sui sooupu malo le sailimalo, malo le lototetele faamalo le loto toa. O outou o le tuasivi o le Faalapotopotoga lenei e faamoemoe ai le ola ma le oti o le tatou Faalapotopotoga lenei e faamoemoe ai le ola ma le oti o le tatou Faalapotopotoga. A faavaivai outou ua tuu itiitia tupe maua a le Faalapotopotoga ae a malolosi le tatou faatau atu o tatou insurance policies ia ua siitia maualuga foi tupe maua a le tatou Faalapotopotoga a maua ai a outou seleni lelei aua aiga, nuu ma le ekalesia.

Ou te ioe ma talitonu o le galuega o lo o outou faatinoina e le se galuega faigofie. E le faigofie le tauanauina o le mamalu o le atunuu ina ia faia ni a latou inisua. E le faigofie le tuua o aiga ae faimalaga atu e sell i Savaii ma nuu I tua. Ou te masalo foi o nisi o taimi e amusia ai ma inosia outou e Falefaigaluega ma Company i le faalavelave i taimi faigaluega. Faamalo faafetai i lo outou soifua galue mo Samoa ma lona atinaeina aua se Samoa manuia mo a taeao.

O lea, tatou faamalolosi e faatino o tatou valaauina e le gata mo se manuia alualu i luma o lenei Faalapotopotoga ao le tou tupe maua e tausui ai nai o outou aiga. Aua a le maua ni au pisinisi ua faaletonu foi lau seleni maua.

O la matou tatalo, alofagia e le Atua foai le malosi, faaoloaina outou I tomai ma agavaa eseese ina ia faigofie le faatinoga o la outou pitolau. Tatou faagalo ni faaletonu o lea tausaga faaletupe ua tuanai ae tulituli so tatou ai i la tatou savaliga fou.

Alofa mai le Atua I lenei aso ma ona fuafuaga uma.

SOIFUA

Ata Pueina Lusia Solinuu