FAAMANATUINA O LE 100 TAUSAGA O LE KALAPU LAKAPI A MOATA’A [03 Iuni 2025]

SAMOA, June 3 - SAUNOAGA AUTU a le afioga i le Palemia, Fiame Naomi Mata’afa

Lau susuga ile ta’ita’i o le sauniga, lau Susuga Rev. Semikueva Fa’atoafe,

Minisitā o le Kapeneta;

Le paia maualuga o le afioaga i ona tulaga fa’alupe;

Sui mamalu uma o le Kalapu Lakapi a Moata’a ua tatou mafuta, aiga, uo ma e masani.

E talitonu ua fofoga le lagi i le taulaga siitia lea sa fitaituga ai le susuga ile faafeagaiga ole EFKS i Moata’a. Fa’afetai i lau Susuga i le Fa’afeagaiga mo le manavaga pa’ia i lenei taeao. Ia alofagia e le Atua, maua pea lou malosi i le tino, sili i le mafaufau ma le agaga aua le tala’iina o Lona finagalo. Fa’amanuia le Atua.

O le a taoto pea ia faatupe o taulafoga, paia sausaugatā o Samoa aua o le ao mamala. Ae ou te faatulou i paia faale talalelei, paia faale-Malo ma paia faale-atunuu. O le paia lava lea i Aiga ma a latou Tama, o Tama foi ma o latou Aiga, Le mamalu o le Usoga a Tumua ma Pule Itu’au ma Alataua, Aiga i le Tai ma le Va’a o Fonoti. E le faagaloina foi le paia maualuga i o tatou uso i le motu i sasa’e i le afifio o Sua ma le Vaifanua, Fofō ma Aitulagi, Sa’ole ma Saleaumua ma le Launiu Saelua, To’oto’o ole Faleula, ma Tama a le Manu’atele. O paia ta’oto’oto ia ua lipoi i Matagialalua nei i lenei taeao.

Ae faapito ‘augafa se faamatalaga i le ‘auga o ‘aute o lenei aso, i le paia maualuga o le afioaga o Moata’a ma lana Kalapu Lakapi, e pei ona i ai le faamoemoe o lenei taeao, ma lenei vaiaso. O le pa’ia lava lea i le afio o le afioga ile matua ia Tofaeono, Asi ma le Patu, i la’ua na ta’i, aiga e tolu, ma le mamalu i le nofoituaiga ia Fuata. O paia ma mamalu, nu’unu’u atu ia faatini o Tausala, aua o paia ua taoto a o se alao’o, e lē toe mamanuina pe toe tau faafuluina.

O le fa’amoemoe o lenei aso o le tatala aloa’iina o le vaiaso faapitoa mo le faamanatuina o le atoaga o le 100 Tausaga o le Kalapu Lakapi a le afioaga o Moata’a. Tatou te faafetaia ai le alofa o le Atua ona o Lana ta’ita’iga i le mamalu o le Kalapu Lakapi aemaise o i latou na mua i malae ile faatūina o le Kalapu Lakapi ile tausaga e 1924, lea ua tatou patipatia fua vaaia o lona agalelei e ala i Lana taitaiga mai nei tausaga e tele, ae o loo tumau pea ā na meaalofa i le mamalu o le afioaga ma sui o le Kalapu Lakapi.

E pei ona ta’ua, o le tasi lenei o Kalapu Lakapi na mua’i faavaeina i le tausaga e 1924, lea na atoa aloa’ia i le tausaga na te’a nei lona 100 tausaga. O se matati’a lē ‘aumaua lenei ua ‘ausia e le Kalapu Lakapi, pe a to manatu i le savaliga umi na tauasa mai aemaise o tamā o le afioaga sa taulamua i le faatinoina o le taaloga o le lakapi i ia vaitau.

E le tau faailoaina le telē o le sao taua o le Kalapu Lakapi a Moata’a i le atina’eina o le taaloga o le lakapi i Samoa. E le gata i alo ma fanau a le afioaga o Moata’a, ae sa tatala faitoto’a i soo se tama talavou mai isi afioaga ma nuu tua’oi e i ai taleni i le taaloga o le lakapi. E toatele sui o le Kalapu lakapi lenei sa avea ma ave fu’a a Samoa i le lalolagi e ala i le fa’agatama o le lakapi. E le taumate o loo auai mai nisi o sui tuai o lenei Kalapu, sa avea ma sui o le Manu Samoa i tausaga e tele ua tuana’i, e le gata i le ta’ito’a sefululima ae faapea foi i le lakapi ta’ito’afitu.

Ou te tau manatua nisi o matati’a a le kalapu lakapi lenei a Moata’a e aofia ai le filifilia o le toatele o sui o le Kalapu i le au ta’ito’afitu sa fai ma sui o Samoa i le taamilosaga o lakapi taitoafitu sa faia i Hong Kong i le tausaga e 1993. O le vaitaimi lea e le i i ai ni taamilosaga e pei o le IRB Sevens. Ae o le taamilosaga aupito maualuga lea i lena vaitaimi, ona o le telē o le tupe mo le ‘au e manumalo i le ipu ‘autu. O le taimi muamua lea na sola mai ai Samoa ma le manumalo i le taamilosaga lenei i Hong Kong, ae o le toatele o tama na filifilia i lea ‘au, o sui mai i le kalapu lenei a Moata’a. O le Faiaoga o le au taitoafitu lava lea, o se tasi o sui iloga o le Kalapu na maoa’e foi la na ta’alo i le au faavao-malo a Samoa, le uigi ta’uta’ua, le susuga ia Taufusi Salesa, ae o le Pule o le ‘au (Manageress) o le tinā ia Marina Schaffausen.

A sa’o la’u maitau, na o le pau lava foi lea o le kalapu na iloga lona tula’i mai ile faatinoina o le taaloga i lalo o le taitaiga a se tinā poo se tamaita’i. O se tasi o matati’a iloga a le kalapu lakapi lenei. O le vaitaimi foi lava lea sa maualuga ai le tulaga o le taamilosaga ta’ito’afitu a le Kalapu Ta’alo a Malisi lea foi na maoa’e ai le tulaga o le au lakapi a Moata’a, ile avea ma siamupini i le tele o tausaga o le taamilosaga ta’ito’afitu a le Kalapu Ta’alo a Malisi Samoa.

Ou te manatua se tasi o tamalii, o se alo e faasino i le afioaga, le afioga ia Savae Sir. Michael Jones, sa matua iloga foi lona tulai mai e le gata o lona sao i le atina’eina o le taaloga i Samoa nei, ae o lea lava foi sa molimauina lona soifua tauivi ma avea ai ma numera 7 tauta’ua o le ‘au malosi a le Olopeleki a Niu Sila. O lea foi ua faapaleina i se faailoga taualoa i Niu Sila lea ua fa’alagi ai ia “Sir. Michael Jones”, o se tulaga tofi e faigata ona ‘ausia e soo se tagata.

E toatele foi nisi o sui o le kalapu sa matuā iloga lo latou tulai mai i le faatinoina o le taaloga o le lakapi, peitai e lē mafai ona ou tolaulauina ona o le toatele o i latou. Ae talitonu, e i ai se taimi a o faagasolo le faamanatuina o le 100 tausaga, o le a fofogaina ai suafa o i latou uma, aemaise i latou sa maoa’e lo latou faatinoina o le taaloga o le lakapi mo le Kalapu.

O se tasi lenei o manulauti ua faataoto a le tatou Malo, o le faaleleia atili lea o le atina’e o taaloga i Samoa ma ia una’ia avanoa mo tupulaga o Samoa e fai ai a latou filifiliga, mo lo latou lumanai e aofia ai ma avanoa i taaloga eseese. O le masina o Iulai ile tausaga na te’a nei, na tatala aloaia ai le Matagaluega fou ua ta’ua o le Matagaluega o Taaloga, ma Alaga’oa mo Fiafiaga o Tagata, lea ua faapito’augafa ā na auaunaga ma fuafuaga alualu mamao mo le atina’eina o taaloga. E pei ona silafia o le vaega o taaloga sa avea o se tasi o itutino o le Matagaluega o Aoga i tausaga ua tuana’i. Peitai o le silasila a le Malo, e ao ona faamalosia le itu tau i taaloga, ma ua alagatatau ai ona faatuina se Matagaluega faapitoa mo le atina’e o taaloga i Samoa.

O se tasi o vaega taua e pei ona ou māua ile faamanatuina o le 100 tausaga o la outou Kalapu Lakapi, o le auai lea o ‘au lakapi a alii e logonoa i le taamiloasaga o lakapi ta’ito’afitu. O se mitamitaga i lo tatou Malo ona o lō outou amana’ia, ma le faatāuaina o i latou e i ai aafiaga tumau o le soifua i lō outou faamoemoe.

Ou te fia faaaogaina ai lenei avanoa e fai ai a’u ma Sui o lo tatou Malo, e momoli atu le faafetai tele i le paia ma le mamalu o le afioaga o Moata’a, aemaise o sui uma o le Kalapu Lakapi e le gata ia i latou o loo ta’aalo pea i le tami nei, ae o i latou uma sa asā le vao filifili i le tau amataina mai ma le faavaeina o le Kalapu i tausaga e tele ua tuanai. E le gata i lea, a o i latou o sui o le kalapu sa iloga lo latou sao ile atina’e o le lakapi i Samoa ma avea foi ma sui filifilia o au faavao-malo i le lalolagi.

E lē faigofie le taumafai e fa’aauau le maopopoga o faalapotopotoga faapenei e pei o kalapu lakapi, aemaise o le tulaga utiuti o tupe maua e lagolago ai taumafaiga. Peitai, ua molimauina i lenei taeao lo outou lotonuu, ma lo outou loto tetele ua mafai ai ona tuu faatasia lenei polokalame taua e faamanatu ai lenei matati’a ausia gatā, ae o lea ausia e la outou kalapu.

Ia alofagia e le Atua fuafuaga ma faamoemoega uma mo le faamanatuina o le 100 tausaga. Ia tumau pea lo outou naunau e atina’e le taaloga o le lakapi e le gata o alo ma fanau a le afioaga, ae faapea foi Samoa.

Se taimi tu’u ama le fua ma ta’ape-le-filialii, ia alofagia e le Atua le mamalu o le afioaga, aemaise sui o le Kalapu Lakapi ua faapito augafa i ai lenei faamoemoe taua.

Ia manūteleina lenei aso i le Alofa o le Atua ma ia Manuia le Faamoemoe o le Faamanatuina o le 100 Tausaga o la outou Kalapu Lakapi.

Soifua ma ia manuia.

Ata Pueina – Malo o Samoa [Leota Marc Membrere]

June 11, 2025