SAUNOAGA AUTU A LE AFIOGA ILE MINISITA O LE SOIFUA MALOLOINA FA’AU’UGA A ALII MA TAMA’ITA’I FOMAI
SAMOA, January 31 - (Aso Faraile 31 Ianuari 2025)
E mua’i fa’atalofa atu ile susuga ile ta’ita’i o le sauniga, faafetai mo talosaga molia o lenei itula ma se ‘upu fa’alae’iau ua e fofogaina, e tõmatauina ai le fa’amoemoe o ali’i ma tama’ita’i foma’i e to’a 15 fa’au’uina e pei ona tatou iai ile asō.
E talitonu le manatu, ua nofo fale i aai o finagalo o le ‘au fa’au’u nei, se upu fa’alae’i’au ua e fofogaina, e tapu’e ai lo latou soifua galulue e tusa ai ma lo latou vala’auina e le Atua. Ia alofagia e le Atua, fa’atumu lau utu faale-agaga auã le Atua ma lona finagalo.
Ou te fa’atalofa atu foi i Lau susuga ile Ta’ita’ifono o le Fono Fa’afoe mo Tomai Fa’afoma’i, tainane le pa’ia o le saofaiga o Alii ma Tama’ita’i Foma’i, le afifio o pa’ia o aiga ma mātua o le ‘au fa’au’u ua aofaga potopoto mai, faapea i latou ua patino iai lenei aso.
O upu i taeao o le atunu’u, o upu ua uma ona mamanu fa’atiti ile tofã i ãiga ma le fa’autaga i faleupolu.
O ona sa foi ma pa’ia, ua mae’a ona totofi, ma o le a le o’o iai se fa’amatalaga, ae tatou fa’aaogaina pa’ia o le Atua, e ‘auga iai lenei fa’amoemoe, ma le taeao sili, o le taeao na alaga ai le leo o le fa’aolataga ina ua auina mai e le Atua lona Alo o Iesu Keriso e togiola i tatou, o le taeao lena e iai le asõ.
Ua maualuga le asõ auã e maualuga lē e ona le aso. Ua fa’ailo foi ‘auga o aute o lenei fa’amoemoe e pei ona iai lenei mafutaga. I lo’u tulaga fa’a-Minisita o le Soifua Maloloina, e lagona le fa’agae’etia ma le loto fa’afetai ua fa’ataunu’uina ma le manuia le fa’amoemoe o alo ma fanau nei o le atunu’u, e fesoasoani ile tulaga ‘uti’uti o iai fomai e tautuaina le soifua maloloina o le atunu’u.
E lē taumate le tele o galuega ma auaunaga o le soifua maloloina e mo’omia le fa’aleleia i lenei vaitau’ auã le tali atu i mana’oga tau le soifua maloloina o le atunu’u, aemaise lava i auaunaga tau foma’i. O lea la ua tau lau o le fa’amoemoe o alo ma fanau nei, o le viiga e foi ile Atua, auā o fa’anaunauga nei a lo tatou malo, e ala ai foi ona fa’amatu’u mai tupe e fa’atupeina ai a outou a’oa’oga, ina ia maua le tomai ma agava’a mo’omia, auā lava le soifua maloloina o o tatou tagata.
E avea foi lenei avanoa e fa’aleo ai le agaga fa’afetai ile tapuaiga mau ai a le mamalu o aiga, faapea mātua o fanau fa’au’u. E talitonu sa outou tu’i le mulipapaga ma fai faiva o Fe’epō ina ia tini ma tau lau o le fa’amoemoe o alo ma fanau nei. Fa’amalo tapua’i, fa’amalo lagolago i taumafaiga a nai fanau.
Mo le fanau fa’au’u i lenei vaega o le aso, o la’u tatalo, ia fa’atāua lo outou vala’auina. Ia fa’amuamua le loto alofa ma le fa’amaoni e fa’atinoina ai tiute ma faiva ua fa’aeaina ai outou e le Atua e pei ona o tatou patipatia ile asō. Ia fa’amuamua o tatou tagata i la outou tautua, ae le o le tupe. A tatou galulue ma le fa’amaoni, ma faia ma le alofa, e mulia’i fa’amanuiaga tau tupe tou te maua, i fa’amanuiaga e tu’u gutu mai e le mamalu o le atunu’u tou te tautuaina.
Ia o tatou manatua, ua afio lo tatou Alii Fa’aola ile lagi, ae ua tu’uina mai lana auaunaga fa’aola sa faia i le lalolagi tatou te fa’aauauina, a’o nei mea uma sa faia e Iesu Keriso, sa ofo fuaina e pei o lana fetalaiga, “Ou te lei sau e auauna mai tagata ia te a’u, a ia ou auauna atu i tagata”.
Ia fa’apena se lagona e afua ai lo outou ola tautua. Ia galue ma le filigā, ma ia faia ma le alofa. O a faigata ma lu’itau o le a feagai ai ile fa’atinoga o le auaunaga, saili ile Atua.
Ia alofagia e le Atua lo outou soifua galulue o le a amatalia. Ia manuteleina foi le loaloa ua tatou molimauina fa’atasi lenei fa’amoemoe tāua.
Soifua ma ia manuia.
Ata Pueina – Malo o Samoa (Leota Marc Membrere)
Legal Disclaimer:
EIN Presswire provides this news content "as is" without warranty of any kind. We do not accept any responsibility or liability for the accuracy, content, images, videos, licenses, completeness, legality, or reliability of the information contained in this article. If you have any complaints or copyright issues related to this article, kindly contact the author above.
